Magsuon mipatay sa silingan gi-'life'

Gihukmang mabilanggo ni RTC branch 15 Judge Fortunato de Gracia sa tibuok nilang kinabuhi ug pabayron og P150 mil sa danyos sa pamilya sa biktima sa duha ka managsuon kinsa mipusil ug mitigbas patay sa ilang silingan.

Si Freddie ug Rolando "Torni" Cuizon pabayaron og P50 mil nga moral damages, P50 mil sa exemplary damages ug P50 mil sa civil indemnity.

Ang maong pagpamusil nahitabo niadtong Hulyo 12, 1999 sa buntag diha sa Sityo Cantipla, Tabunan niining dakbayan.

Ang biktima mao si Edgar Ubod kinsa gitabangan og atake sa magsuong Cuizon nga mga armado og armas ug sundang.

Si Cecilia, 41-anyos biyuda ni Ubod mibutyag sa korte nga sa wala pa mahitabo ang insidente ang iyang bana ug ang magsuong Cuizon nagkabangi tungod sa ilang manok nga gikawat sa mga akusado og gibawi kini sa iyang bana.

Ang saksi sa hitabo nga si Sosimo Narra mibutyag usab sa korte nga sa wala pa mahitabo ang insidente nagkuyog sila ni Ubod paingon sa Tabunan, Sirao tungod kay iyang tan-awon ang kabaw sa biktima nga iya untang paliton.

Ang magsuong Cuizon natagboan nila ug si Freddie misinggit kini ni Ubod nga "unsa man magpatay na ta?" dayon hulbot sa dala niining armas og gipusil niini ang biktima.

Si Ubod misuway sa pag-ilog sa pusil ni Freddie apan gitigbas kini ni Rolando hangtud nga ang ulo sa biktima mibuwag sa lawas.

Si Teresita 51-anyos asawa ni Rolando mihimakak sa mga pasangil batok sa iyang bana.

Matud ni Teresita nga diha sa ilang balay ang iyang bana tungod kay gihilantan kini.

Si Mary Jane asawa ni Freddie mihimakak usab nga dunay kalambigitan ang iyang bana sa insidente tungod kay aduna kini deperensiya sa panghuna-huna ug dili gani kini makagawas sa ilang balay tungod kay iya kining prisohon inig human niya og pakaon.