Ate Glo gustong ibalhin na sa Kalunasan ang mga BBRC prisoner

Gusto ni Presidente Gloria Arroyo nga mabalhin ang mga naghuot nga piniriso sa Bagong Buhay Rehabilitation Center (BBRC) ngadto na unya sa bag-ong bilanggoan sa Kalunasan sa dili pa ang ASEAN Summit sa Disyembre.

Mao kini nahipos nga kasayuran ni bise mayor Michael Rama human sa iyang gihimong pagpakigtagbo ngadto kang Department of Interior and Local Government (DILG) Secretary Ronaldo Puno didto sa Malacañang sa milabay'ng adlaw.

Tungod niini, malaumon ang bise mayor nga matiwas na ang ginagmay'ng kulang sa gitukod karon nga bag-ong bilanggoan sa Kalunasan human mitugot na si Arroyo nga mohatag og gahin alang sa pagpataud og suplay sa tubig alang sa mga piniriso diha sa maong bilanggoan.

Ang Malacañang una nang mipagawas og P30 milyones nga pundo pagtukod sa maong edipisyo ug gisundan kini sa laing P5 milyones nga maoy gigamit sa pagpakural sa palibot niini.

Nagkanayon si Rama nga posibling matigayon ang pagbalhin sa mga piniriso sa BBRC ngadto na sa Kalunasan kun makumpleto na ang maong konstruksyon ug kun motugot na si Osmeña.

Si Osmeña pabilin kining nagmagahi pagtugot nga ibalhin sa bag-ong bilanggoan ang mga piniriso sa BBRC hangtud nga dili makapatuman og reporma ang BJMP sa mga kahiwian nga nahitabo diha sa maong bilanggoan ilabi na gyud sa korupsiyon.

Alang kang Rama angay gyud nga mabalhin ang maong bilanggoan ngadto sa Kalunasan sa wala pay Asean Summit gumikan kay gawas nga hugaw kining tan-awon makahatag usab kini og negatibong epekto ngadto sa mga delegado nga anha moabot unya sa Waterfront Hotel nga nahimutang dili layo sa maong bilanggoan.