3 ka anak gilugos sa papa

Usa ka amahan sa Langtad, Argao ang gidakop sa kapolisan human kini ireklamo sa tulo ka mga anak niining babaye nga milugos kanila.

Ang gidakop mao si Reylan (apelyido gipugngan) 44, nagpuyo sa maong dapit ug nagtingkagol na kini sa sulod sa bilanggoan.

Si SPO1 Jimmy Mendoza sa kapolisan sa nahisgotang lungsod nga gikahinabi sa Banat News nagkanayon nga ilang gidakop ang suspetsado human ang 12 anyos nga anak niining babaye mireklamo ngadto kanila.

Dugang pa niya nga sa imbestigasyon nga gihimo nila ni PO1 Vivian Tamayo ug PO1 Virgilia Alvaracin sa Women Desk Section ug ang Department of Social Welfare and Development (DSWD) nasuta nga ang duha ka mga anak nga babaye sa biktima nga nagpanuigon og 8 ug 9 ang lakip usab sa gipanamastamasan ni Reylan.

Sa imbestigasyon nila ni PO1 Alvaracin ug PO1 Tamayo ilang nasuta nga ang pagpanamastamas sa suspetsado ngadto sa mga biktima sagad nga mahitabo nga wala diha ang ilang inahan.

Sa nasayran sa Banat News nga unang mitaho ang 12 anyos nga biktima ngadto sa iyang magtutudlo sa tunghaan diin magtungha ang bata.

Ang prinsipal sa tunghaan nga si Estrella Reymonde maoy mitaho niini sa kapolisan nga maoy hinungdan nga gidakop human masuta nga positibo ang resulta sa pakisusi niining gihimo.