Review centers sa Visayas higpitan

Hugtan na sa gobyerno ang pagbantay sa mga review center aron dili na masubli ang nahitabong "leakage" sama sa board examination sa kursong nursing sa nasud.

Matud pa ni Regional Director Enrique Grecia sa Commission on Higher Education (CHED-7) nga may mando na si Presidente Gloria Macapagal Arroyo nga ipaubos sa superbisyon sa CHED ang nursing review center sa tibook nasud karon.

Gani dinhi sa Central Visayas gipaabot nalang ni Grecia ang opisyal nga pahibawo gikan kang CHED chairman Carlito Puno alang sa bag-ong tahas nga atubangon sa mga tawo sa Ched.

Ang CHED maoy gitugyanan sa gobyerno sa pagdumala sa mga kalihukan sa mga kolehiyo ug unibersidad nga pribado ug publiko.

Apan gumikan sa pagkakuwang sa balaod, walay review center sa bisan unsang kurso nga gibutang ubos sa pagsuperbisar sa hain mang ahensya sa gobyerno.

Matud pa ni Grecia nga kasagaran sa ablihang review center, anha ra molukat og lisensya sa Department of Trade and Industry (DTI) kay usa kini sa gikonsiderar nga pribadong negosyo.

Miingon si Grecia nga inigkahuman sa guidelines nga itunol sa Malacañang ngadto kang Puno mga duha ka semana gikan karon, masayran na, nga wala nay makatukod og review center nga way permiso gikan sa CHED.