Pagdebelop gipahunong

Tigdumala sa gipatukod nga restaurant diha sa Sawsawan Barangay Tangke Talisay gimanduan ni Mayor Socrates Fernandez nga ipahunong ang gipahigayon nilang pag-develop sa lugar human ang mga residente miduso og reklamo batok sa maong patigayon.

Matud ni Fernandez nga kinahanglan nga mohuwat una sa desisyon sa Department of Environment and Natural Resources (DENR) para sa approval sa miaplay sa luna.

Ang mga miyembro sa Pundok sa mga Gagmay'ng Mananagat sa Sawsawan (PGMS) miaplay usab para makatag-iya sa luna nga nag-atubang sa lote diin si Chuan Sing Yu nagpatukod sa iyang restaurant.

Ang memorandum nga giluwatan ni Fernandez niadtong Agosto 28, nag-awhag sa tigdumala sa nahisgutang patigayon nga dili una ipadayon ang construction sa edipisyo ilabi na diha sa atubangang bahin sa lote ni Cebu City councilor Procopio Fernandez.

Sa laing bahin, si Talisay City Legal Officer Aurora Econg miawhag usab sa contractor nga temporaryo unang hunongon ang konstraksiyon sa proyekto para walay mahitabong kasamok tali sa tigdumala sa maong restaurant ug sa mga residente sa lugar.

Ang mga mangingisda usab sa lugar giawhag usab ni Econg nga mohunong sa ilang pagpahigayon og demonstrasyon nga posibleng moresulta sa ilang pagkaangol.