Girapido sa nag-Revo usa patay

Usa ang namatay diha-diha,samtang duha ang anaa sa kritikal nga kahimtang sulod sa tambalanan human sa sunod-sunod nga pagpamusil nga nahitabo sa managlahing lugar, gidudahang upat ka wala pa mailhing mga tawo pulos armado og kalibre 45 pistola luwan sa pribadong sakyanan nga Revo kolor gray walay plaka pasado alas 4 sa kagahapon sa kaadlawon diha sa Cansojong ug Dumlog, Talisay.

Dead on the spot ang usa ka drayber sa PUJ human makaangkon og samad pinusilan sa iyang lawas mao si Panfilo Baringue, 49, minyo residente sa Ramona Village, San Isidro, ug kritikal usab ang iyang kondoktor nga si Temoteo Aleo, 33, minyo, nagpuyo sa Cadul-dulan, Bulacao Talisay.

Si Aleo nakaangkon og duha ka samad pinusilan diha sa tuong bukton, apan ang usa niini nisulod sa lawas.

Human mangahagba ang duha ka biktima diha sa waiting shed ang mga suspetsado daling miikyas apan pag-abot sa Dumlog sa maong dakbayan lain na usab ang gipamusil sa mao gihapong grupo.

Ang mga biktima giila sa kapolisan mao sila si Edmund Reyes Ong, 18, ulitawo, taga Bulacao ug Carlos De la Calsada, 22, residente sa Dumlog.

Si Ong naigo diha sa luyong bahin sa ulo, samtang si Dela Calsada diha usab sa tiyan ug tuo nga paa.

Ang tulo ka mga biktima anaa karon nalandig sa Don Vicente Sotto Memorial Medical Center dinhi sa dakbayan, diin talandugon mao sila si Dela Calsada ug Aleo.

"Posibling tripping ra seguro nila (suspek) basin mga high na sa drugas ba paeta nu, amo gayud ning paninguhaon nga mailhan namo ning mga tawhana" dugang asoy ni PO2 Rosales sa dihang nahinabi sa Banat News kagahapon sa hapon.

Hangtod karon padayon pa ang kapolisan sa pagkutlo og dugang mga ebidensiya sa mga saksi aron mailhan ang responsable sa krimen.