Coping midepensa sa iyang beach resort sa Tangke, Talisay

Walay intensiyon si Konsehal Procopio "Coping" Fernandez sa pagpapahawa o ba kaha pagputol sa kapanginabuhian sa mga mananagat nga molupyo sa barangay Tangke, Talisay nunot sa pagatukoron niyang proyekto sa nahisgutang lugar.

Giklaro ni Fernandez dihang nahinabi sa Banat News nga tuyo lang niya mao ang pagtabang sa pagpalambo sa dakbayan sa Talisay pinaagi sa gitukod niya nga usa ka modernong restaurant ingon man swimming pool diha sa Tangke Talisay.

Nunot niini, gipasalig sa konsehal nga matagad pa unya og limpyo ang tibuok baybayon nga nasakop sa iyang hurisdiksyon.

Si Fernandez nakakuha kini og foreshore lease sa maong lugar niadto pang tuig 1984.

Gawas niini, si Talisay City Engineer Audie Bacasmas mirekomendar na usab alang sa construction permit sa maong restaurant ug beach resort nga tukoron sa konsehal diha sa maong lugar human kini makatuman sa tanang mga rekisitos sama sa pag-aplay og environmental compliance certificate (ECC).

Niadtong milabay'ng adlaw dunay pipila ka mga nagpailang mananagat nga sakop sa mga militanting pundok nga Anakpawis ang mireklamo nga apektado ang ilang kapanginabuhian sama sa pagpanagat sa tukoron nga proyekto sa maong lugar.