Palpak nga raid sa Calamba gikasuko

Wala mahimuot ang pipila ka mga opisyal sa dakbayan sa Sugbo sa napalpak nga pagpangronda sa kapolisan batok sa gituohang notadong drug pushers sa Calamba tungod kay gitabangan kini sa mga molupyo sa nahisgutang lugar.

Sigun sa taho nga nadawat ni Konsehal Procopio "Coping" Fernandez nadakpan na unta sa kapolisan sa San Nicolas Police Station ang subject nga si Edward "Ewar" Baldesamo sa buy bust operation sa may Sityo Mahayahay A. Lopez.

Apan tungod sa giingong paglaban sa mga silingan niini nga daw mipahigayon og People Power nakahigayon sa pag-eskapo ang suspek ug walay nahimo ang kapolisan nga gipangulohan ni SPO2 Jessie Yramis.

Ang maong panghitabo gikasubo kaayo ni Fernandez ug gitakda kining makigtagbo ngadto ni Cebu City Police Office Chief Supt. Melvin Gayotin.

Gisugyot hinuon sa konsehal nga paningkamotan nga dili na masubli ang maong panghitabo pinaagi sa pagpangayo og mga back-up force kun mopahigayon kini og mga pagpangronda aron siguradong dili na makahigayon sa pag-eskapo ang mga suspek nga madakpan.

Apil sa gisugyot sa konsehal nga magdala og mga sakop sa media kun dunay mga pagpangronda nga himuon aron makahipos og footages ug matumbok kun si kinsa ang mga sibilyan nga mo-interbiner sa mga pagpangronda nga himuon.