Gibutyag ni Atty. Joseph Bernaldez, assistant city attorney, nga mahimong basehan ang police power aron mapasirad-an sa labing daling panahon ang maong establisamento.
Gikonpirmar ni Bernaldez ang nagpatongpatong nga mga kalapasan nga nahimo sa management sa Mango Square sama sa pagka-walay building permit ug ang kapakyas pagkuha og location clearance gikan sa Cebu City Planning Office.
Gawas niini nakadawat usab si Mayor Tomas Osmeña ingon man ang City Legal Office ug daghang mga reklamo may labot sa mga law-ay'ng pasundayag sa mga establisamento sa maong lugar ilabi na panahon sa gabii ug ang pagpamaligya og mga ilimnong makahubog ngadto sa mga minor de edad.
Gikonsiderar ni Bernaldez nga nahisama nga usa ka 'breeding ground' sa mga prostitute ang maong lugar nga maoy gikabuangan nga suroyanan sa mga batan-on panahon sa gabii.
Pagkakaron gipaabot na lang sa City Attorneys Office ang kamanduan ni Osmeña aron paghimo og tukmang lakang batok sa maong establisamento.