Eskwater sa Mandaue ipahiluna

Ang pagpahiluna sa mga kabus nga lumolupyo sa dakbayan sa Mandaue ngadto sa relocation site barangay Casili ug barangay Canduman maoy gitinguha ni Mayor Thadeo Ouano.

Si Mayor Ouano nga gikahinabi sa Banat News miingon nga ang tinguha sa mga kabus nga lumolupyo sa dakbayan gitumong alang sa pagsulbad sa suliran sa mga squatter.

Si Mayor Ouano miingon nga dakong problema sa kagamhanan ang kabus nga lumolupyo nga nag-antos sa ilang pagpuyo sa mga luna sa gobiyerno ug pribado.

Dugang pa ni Ouano nga ang dakbayan nga nagbaton lamang og 400 kapin ka mga establisamento sa tuig 2001 ang nadoble ang maong gidaghanon sa tuig 2005.

Daghan ang nakasulod og trabaho sa dakbayan sa pagdoble sa gidaghanon sa mga establisamento, magkagrabe usab ang suliran sa informal settlers sa dakbayan.

Matud pa sa mayor nga ang pagpahiluna sa mokabat 300 ka lumolupyo sa Paradise Island sa Looc nga anaa usab sa kakuyaw sa daplin sa Mactan Channel maoy nag-una nga mabalhin.

Ang pagbalhin matuman kon matigayon ang kaugmaran sa medium-rise-condominium project nga gikatakdang matukod sa dili pa ang Asean Summit karong Disyembre niining tuiga.