Security agency dunay tulubagon

Dunay tulubagong administratiba ang security agency nga maoy nanag-iya sa mga tag-as nga kalibre sa armas nga na-intercept sa mga sakop sa 7th Police Center for Aviation Security nga nagbase diha sa Mactan Cebu International Airport niadtong milabay'ng Huwebes.

Sumala pang Police Regional Office 7 director Chief Supt. Silverio Alarcio nga manubag ang Kadayawan Security Agency ngadto sa Firearms and Explosives Security Agency Guards Supervisory Section (FESAGSS) tungod sa ilang mga lapso.

Matud pang Alarcio nga posibleng pahamtangan og multa ang maong security agency tungod sa ilang mga kalapasan sa guidelines kabahin sa pagbiyahe, pagsunod sa proseso sa usa ka ahensya ngadto sa FESAGSS.

Samtang giklaro ni Alarcio nga ligal ang pagsulod sa maong mga armas dinhi base sa pasiunang imbestigasyon ug wala kini kalambigitan sa umaabot nga ASEAN Summit.

"It is not intended to disrupt the ASEAN summit gaya ng naunang mga lumabas na report," asoy pang Alarcio.

Gawas lang sa problema sa pagdokumento sa pagbiyahe niini ug walay koordinasyon sa lokal nga kapolisan dinhi.

Si Sr. Supt. Lyndon Lawas ang hepe sa Firearms and Explosives Division sa pakighinabi sa Banat News nagkanayon nga nakasumitir na og photocopy nga dokumentos ang branch sa Kadayawan sa iyang buhatan kagahapon ug karong adlawa magtagbo aron masusi ang orihinal nga mga lisensya ug dokumentos sa maong mga armas.

Usa sa nakitang diperensya sa FESAGSS mao ang wala pagparehistro sa Kadayawan Security Agency ngadto sa ilang buhatan ug sa provincial police office nga maoy implementing guidelines sa mga security agency nga dunay gitukod nga branch layo sa ilang lugar.

Ang Kadayawan Security Agency naggikan sa Davao City ug gikatahong bag-uhay lang nakakuha og kontrata sa usa ka bangko dinhi nga nagkinahanglan og escort sa ilang armored vans nga magdala og dagkong kantidad nga kwarta.

Si Alarcio dihang gipangutana sa Banat News kung nganong AK-47 paman ang gipiling armas sa maong ahensya, ang opisyal nagkanayon nga posibleng mas gipili nila ang barato sanglit mas mahal ang ubang tag-as nga kalibre sa armas nga 7.62 nga kalibre sama sa M14 assault rifles.