Trainees sa RTS-7 mi-petisyon vs hepe

Mga estudyente sa Police Regional Training School (RTS) 7 sa Apas ning dakbayan miduso og reklamo batok sa ilang officer in charge nga gipasakaan og kasong sexual harassment sa usa nila ka kaubang babaye..

Mga 72 ka estudyante mipirma og petisyon batok ni Police Superintendent Eldorado Gallego.

Ang maong mga estudyante mibutyag nga si PO1 Blaire Francis Cuevas-Quezon kinsa ang inahan niini usa ka civilian employee sa RTS maoy biktima ni Gallego apan nahadlok lang kini nga mobutyag sa hitabo.

Si Gallego gipasanginlan usab sa maong mga estudyante nga migamit sa uban nilang mga classmate isip assistant instructor sa mga bag-ong police recruits hinungdan nga dili kini makatambong sa ilang klase matag-adlaw lakip na sa practical exercise ug mga eksaminasyon.

Usa sa sakyanan sa mga estudyante nga nagtangag sa plakang YBF-171 gihulman ni Gallego nga hangtud karon wala pa mauli ug gituohang padayon nga gigamit sa maong opisyal ug ang tag-iya nahadlok sa pagbawi sa iyang sakyanan.

Si Gallego gipasanginlan nga mosulod usahay sa quarter sa mga babaye nga dili mananghid diin atol sa pagsulod sa maong opisyal ang mga estudyanteng babaye wala pa makailis nagsul-ob pa kini og bra ug ang uban nakatapis pa og tualya.

Apan si Gallego sa iyang bahin mihimakak sa maong mga pasangil lakip na ang pasangil ni Cuevas.