2 ka bata nahilo sa kamoteng kahoy

Duha ka lalaking minor de edad nga tinun-an sa grade 2 sa Toledo South City Central School nangahilo human sila makakaon sa budbod nga kamoteng kahoy nga ilang napalit sa tendira niadtong Biyernes sa hapon nga miresulta sa pagkalandig nila sa tambalanan.

Nalandig sa Toledo District Hospital mao sila si Gemar Villamor, residente sa Luray uno, Poblacion, ug Reil Campilanan, lomulopyo sa Sitio Tunning, Poblacion sa mga pulos nagpangidaron og otso anyos.

Segun sa mga amahan sa biktima sa kapolisan nga matud pa ang ilang mga anak nakapalit sa naninda og budbod gawas sa eskuwelahan.

Human nila makaon ang budbod ug mibalik pagsulod sa eskwelahan wala magdugay ang duha ka minor de edad pagkataudtaod nagmulo sa kasakit sa ilang tiyan og nagsuka-suka, hinungdan nga gidali paghatod sa district hospital.

Si PO3 Jemelon Cotmaya sa Toledo City Police nga nahinabi sa Banat News miingon nga wala makaila ang duha ka minor de edad sa tindera kay dili kadto permanente maninda diha sa maong tunghaan.

"Basin nakagawas ning mga bataa sa luyo sa gate, unya diha seguro tong namaligya og budbod naagi namalit ning duha, kay naa may naninda gayud diha sa gawas nga pirmanente, kadto nataymingan lang gayud nga poisonous tong budbod" si PO3 Cotmaya nagkanayon.

Hinuon gikataho nga luwas na ang duha ka menor de edad sulod sa tambalan apan padayon pa kining giatiman sa mga mananambal.