Si Bise Mayor Michael Rama mipadayag sa iyang walay paglubad nga baruganan pagsupak sa maong plano nga buakbuakon ang Sugbo gumikan kay alang niya dili kini makahatag og kaayuhan sa mga Sugboanon.
Giklaro sa bise mayor nga siya ug ang mga sakop sa konseho nakapagawas na sa ilang hiniusang baruganan nga supakon ang maong lakang.
Gipasabot ni Rama nga dunay katungod nga mag-apil-apil sila ning maong isyu gumikan kay ang siyudad mao man ang capital sa probinsya sa Sugbo.
Apan susama kang Mayor Tomas Osmeña wala hinuon moklaro ang bise mayor kon mosuporta ba siya sa gipasiugdahan karong signature campaign sa kapitolyo nga gitumong aron paghipos og dili mominos 2 milyones ka pirma nga magpadayag sa hugtanong pagsupak sa Sugbuak.
Si Osmeña sa iyang bahin una nang mipadayag nga nag-usik-usik lang sa iyang oras ug panahon ang maong lakang gumikan kay kompyansa siya nga dili gyud molampos ang maong laraw.
Kini bisan pa man og maniobrahon ug mapasar gyud ang maong balaodnon sa kongreso tungod kay sigurado man usab kining mapildi kun mapahigayon gyud ang referundum niini.
Ang Sugbuak bill pormal nang gi-endosar sa House Committee on Rules human kini giaprobahan sa House Committee on Local Government nga gipangulohan ni Kongresista Emilio Macias.