Ang pagpangawat nahitabo sa miaging gabii sa sulod sa Hamnah Farm nga gipanag-iya sa negosyanteng si Alvin Lim nga nahimutang sa Pagsabungan, Mandaue.
Ang nadakpan mao si Godly Inting, 25,ulitawo nga lumad nga taga Cawayan, Masbate ug temporaryong nagpuyo sa Ponce Compound sa dakbayan sa Sugbo.
Si Rolando Quimlog, 46, minyo nga lumad nga taga Loay, Bohol nga sakop sa Maya Security Agency nga nadestino sa pagbantay sa maong establisamento maoy nakadakop sa suspetsado.
Sa pagpakighinabi sa Banat News ni P03 Edgar Pasaylo sa kapolisan sa Basak Police Station maoy nasayran nga usa ka Allan nga taga Carreta sa dakbayan sa Sugbo ang kuyog sa suspetsado nga nadakpan.
Matud pa niya nga nakasulod ang mga suspetsado sa compound sa poultry ug gipangsulod na sa gidalang sako ang mga manok nga igtatari.
Namatikdan kini sa guwardiya nga nag-roving nga maoy hinungdan nga gisitar ug nadakpan ang usa sa mga kawatan.
Gitanggong karon sa sulod sa detention cell ang dinakpan ug gikatakdang pasakaan kini og kaso ngadto sa korte.