Butha'g dinamita patay

Patay diha-diha ang usa ka mananagat kinsa nabuthan og unay sa iyang dinamita nga para unta sa mga isda kagahapon sa buntag diha sa lawod sa Barangay Tulay lungsod sa Minglanilla.

Ang biktima giila nga si Ernesto Villarubia, 46-anyos, residente sa maong lugar.

Si SPO1 Renato Masangkay polis sa Minglanilla mibutyag kagahapon sa Banat News nga mibuto diha sa kamot ni Villarubia ang dinamita niining giduslitan nga gisansan sa usa ka "long neck" nga botilya.

Gihulagway ni SPO1 Masangkay nga nabungkag ang dughan ni Villarubia lakip ang walang bahin sa nawong niini ug nabuwag sa lawas ang tuong bukton nga maoy hinungdan sa kamatayon niini.