Bisita sa b-day party girapido, 1 patay

Mga bisita sa dalagang nag-debut gipamusil diin usa ang namatay ug ang laing duha ang naangol sa miaging gabii sa Lower Malibu, barangay Subangdaku sa dakbayan sa Mandaue.

Ang namatay mao si Francisco Bustillo, 36 anyos, ulitawo nga taga dalan C. Mina sa barangay Mabolo sa dakbayan sa Sugbo ug naangol usab sila si Marvin Degamo ug Jade Sala, pulos 17 anyos, residente sa maong lugar.

Ang tulo kuyog ni Melody Masami, 20 anyos, nga silingan sa namatay kinsa maoy dinapit ni Shiella Castillo nga nag-debut.

Usa ka wala hiilhing lalaking armado og kalibre 45 ang gitumbok nga mipaulan og bala sa mga biktima, ang suspek gikatahong dunay kaubang nagpaabot sa motorsiklo.

Ang pipila ka mga barbeque vendor sa maong dapit nga gikahinabi sa Banat News miingon nga naglakaw na pauli ang mga biktima dihang kalit lang nga gisugat sa armadong lalaki ug gipamusil.

Si SPO1 Emmanuel Enolpe sa Presinto 2 sa Subangdaku Police Station nga gikahinabi sa Banat News nagkanayon ang mga biktima naigo diha sa dughan ug si Bustillo ang nasentro sa kasingkasing.

Si SPO1 Enolpe miingon nga si Marvin Degamo maoy ilang nasuta nga sakop sa Tau Gamma ug Akrho usab si Shiella ang debutante.

Fraternity related ug love triangle maoy gidudahang motibo sa pagpamusil sumala pa sa mga polis.