Bukas sa publiko ang rekord- BID7

Gibuksan sa Bureau of Immigration-7 ang ilang rekord ngadto sa publiko aron ipakita nga walay basehanan ang mga pamasangil nga gipanapi sa maong buhatan ang mga langyaw nga moabot sa Sugbo.

"Our records in the office are open for public scrutiny and the said documents will speak for itself," sumala pa ni BI-7 Director Geronimo Rosas.

Unang gipasanginlan ang BI nga dili mo-isyu og resibo sa mga bayad sa express funds.

"Such is inconsistent with the productiveness of BI Cebu," nagkanayun si Rosas.

Matud pa ni Rosas nga ang BI Cebu maoy labing taas og nakolekta sa tanang buhatan sa BI lukop nasud lakip na ang express lane fund.

Bag-ohay lang, usa ka babaye ang nidangop sa buhatan sa Ombudsman-Visayas ug namasangil nga ang BI-7 ni-isyu og ginamit na nga resibo sa dihang siya ni-apply og extension sa tourist visa sa iyang amo nga Awstralyano.

Gitumbok sa namasangil ang usa ka Fred Suico, confidential agent ug drayber ni Rosas ang ni-isyu kaniya og ginamit nga resibo sa iyang gibayad nga P7,500.

Gumikan niini, gipasakaan usab og kiha si Rosas sa buhatan sa Ombudsman sa maong babaye.

Apan gihangop ni Rosas ang bisan unsang imbestigasyon aron kalimpyohan ang ilang buhatan.