Bangko gilungkab

Ang Aspac Bank sa dalan M.C. Briones sa dakbayan sa Mandaue nga gipanag-iya ni Atty. Agosto Go ang gilungkab ug nawad-an gayod og salapi ug mahalong mga butang.

Ang pagpanglungkab gituohang sa miaging tungang gabii ug alas 7 na sa buntag kagahapon nga nadiskubrehan sa mga kawani.

Kini ang nasayran sa Banat News kang PO1 Chester Quiros sa Presinto 1 sa Centro Police Station sa gihimong pagpakighinabi niini kagahapon.

Matud pa niya nga si Dioscoro Awe nga maoy representante sa maong establisamento miasoy kang SPO1 Ricardo Raagas sa kapolisan sa Presinto 1 nga natingala sila nga nagkatag ang mga butang sa sulod sa ilang buhatan.

Dihang gihimo nila ang pakisusi ilang nasuta nga nahanaw na ang celphone, digital camera ug salapi nga nagkantidad og P4,000 nga gibutang sulod sa maong bangko.

Si SPO1 Raagas miingon nga ilang gitugyan sa Scene on Crime Operation (Soco) ang pagkuha og mga finger print sa sulod sa maong bangko alang sa padayon nilang pakisusi niini.