Polis nga nanion ipatawag sa IAS

Usa ka polis sa Guadalupe Police Station ang ipatawag sa buhatan sa Internal Affairs Service sa Cebu City Police Office karong Lunes tungod sa usa ka reklamo sa residente sa Sandayong , Sapangdaku gumikan sa giingong pagpanion niini og armas sa reklamante.

Ang ipatawag sa IAS mao si SPO4 Felixberto Abelgas, kinsa maoy community cop sa nahisgutang lugar, gipasanginlan ni Rolly Haya, 20, og pagpang-harass ug panion og armas gumikan kay siya maoy gipasanginlang nangawat sa manok sa maong polis niadtong Agosto 21 ning tuiga.

Ang pagpanion gikatahong nahitabo diha sa basketball court sa Sandayong, usa ka adlaw human mawala ang upat ka hiniktang manok ni Abelgas.

"Nangaon kuno ni sila sa iyang lolo unya gi-invite ni si Rolly nga naay makig-estorya niya nga si Abelgas diha sa basketan kay makig-estorya lagi sa nawalang manok, sa alegasyon niya nibunot kuno ni si SPO4 Abelgas og armas ug gition sa kilid dayong gikablit pero wala mobuto, dayon gibira kuno siya ni Willy Oropesa ug gisumbag sa tangkugo kay namotbot kuno siya" asoy pang PO1 Jerson Libatan sa Guadalupe police station sa pakighinabi sa Banat News.

Human siya sukmaga sa bata-bata ni Abelgas nga si Oropesa midagan siya apan gigukod siya niini hinungdan nga silang duha nagsukmagay samtang si Abelgas nagbarog ra nga nagtan-aw.Ang pag-brown out diha-diha maoy gipahimuslan ni Haya aron makadagan palayo, hinungdan nga namauli nalang ang duha. Kusganong gipanghimakak ni Haya ang pasangil sa pagkawala sa manok sa maong polis.

Si Haya nga midangop sa buhatan sa IAS kagahapon sa buntag gitambagan sa IAS nga ipa-blotter sa Guadalupe police station ang nahitabo samtang karong Lunes gikatakdang dunay komprontasyon kanilang duha sa polis diha sa maong buhatan.

Wala pa usab makadesider si Haya kung mopasaka ba og kasong administratiba batok sa maong polis ug laing kaso batok sa kauban niining si Oropesa.