Nasayran gikan kang Director Patricio Gabuya sa DILG-Cebu City Office nga ang tuyo ug tumong niini mao ang pagpasidungog niadtong mga sakop sa Lupong Tagapamayapa sa kabarangayan nga mipatuman og mga epektibong pamaagi aron mapalambo ang paghilot sa mga reklamo nga isang-at diha sa barangay aron dili na kini moabot pa ngadto sa korte.
Matud ni Gabuya ang epektibong pamaagi sa paghusay sa mga reklamo nga isang-at sa barangay maoy usa sa nakatampo og daku aron maangkon sa Busay ang maong pasidungog.
Apil na niini ang pag-update sa report ingon man ang pagsunod sa hustong mga proseso aron mahilot ang maong reklamo nga maduso sa barangay.
Ang Apas maoy naka-angkon sa ikaduhang dapit ug ang Inayawan maoy naka-angkon sa ikatulo.
Ang awarding niini ipahigayon unya sa Nobyembre diin makadawat og pasidungog ang nahisgutang mga barangay nga P3 mil sa Busay, P2 mil alang sa Apas ug P1.5 alang sa Inayawan gikan sa Liga ng Lupong Tagapamayapa dinhi sa dakbayan.
Ang Busay ubos sa pagdumala ni Kapitan Eliodoro "Yudy" Sanchez mao nay magrepresentar sa dakbayan alang sa rehiyonal nga kompetisyon ug kun modaug mao kini ibangga alang sa nasudnong kompetisyon.
Gipadayag ni Gabuya nga ang Labangon ug Punta Princesa maoy unang mga barangay dinhi sa dakbayan nga nakadaug sa susamang kompetisyon lukop nasud niadtong sayong bahin sa 1990, ug ang Lahug maoy labing bag-ong nakadaug niining maong kompetisyon sa milabay'ng tuig.