Mango Square padad-an notisya gikan city hall

Sunod semana pa mapadala sa kagamhanan sa siyudad sa Sugbo ang 10-day notice ni Mayor Tomas Osmeña ngadto sa tagdumala sa Mango Square nga nahimutang sa may dalan Gen. Maxilom Avenue.

Giangkon sa mayor nga wala pa niya ma-asikaso ang pagpadala og notisya sa Mango Square gumikan sa kadaghan sa iyang mga nakahan-ay nga gimbuhaton ug schedule.

Si Osmeña milarga niadtong miaging adlaw paingon sa Manila alang sa tigum niya ni NEDA Secretary Romulo Neri ug kagahapon sa buntag kini nahibalik dinhi sa Sugbo.

Atol sa press conference kagahapon sa udto personal nga gitawagan sa mayor sa cellphone ang mga tinugyanan sa City Attorney's Office alang sa pag-andam niini og notisya batok sa Mango Square.

Mibahad si Osmeña sa tagdumala sa Mango Square nga iya kining pasirad-an ug rebukahon ang business permit kun dili korihian niini ang daghang kalapasan nga nahimo.

Pipila sa daghang mga kalapasan nga nahimo sa nahisgutang edipisyo mao ang kapakyas pagsunod sa building code.

Gawas niini, wala usay klarong parking lot alang sa mga kustomer, peligro sa sunog, ug wala say klarong seguridad nga gikahatag ngadto sa ilang mga kustomer.

Una nang mibahad si Osmeña nga padalhan og mga heavy equipment sama sa bulldozer ang maong edipisyo aron ma-demolish kini human unya sa pagkapupos sa gihatag nga lugway kun dili makahimo og pagkurihir sa mga kalapasan niining nahimo.