Si Osmeña tuyo nga milarga paingon sa kaulohan sa milabay'ng hapon alang sa gitakda niyang pagpakigtagbo ngadto kang National Economic Development Authority (NEDA) Secretary Romulo Neri.
Si Osmeña una nang mipadala og suwat ngadto kang Secretary Neri nga naghangyo sa maong ahensya nga babagan ang natigayon nga kasabutan tungod kay dili kini makiangayon gumikan kay gawas nga mahal ra kaayo ang presyo sa gibaligya niining tubig peligro pang mabangkarota ang MCWD sa umaabot nga mga katuigan.
Ubos sa maong kasabutan ang MCWD mopalit og tubig sa Ayala Stateland sa tag P25 kada metro kubiko nga mas mahal kun itandi sa ubang supplier sama sa Mactan Rock Industries nga tag P18 kada metro kubiko, labaw nga gisupak sa mayor ang pag-obligar sa MCWD nga obligadong mobayad sa 40,000 kada metro kubiko nga i-supply niini matag adlaw bisan og dili kini mahurot sa pagkahalin o ba kaha madaut ang mga bomba sa MCWD.
Labaw nang gisaway sa mayor ang probisyon sa maong kontrata nga pabayron og P200 milyones ang si bisan kinsang supplier nga mo-compete sa pag-suplay og tubig sa umaabot nga mga katuigan.
Gitug-an sa mayor nga wala mahinayon ang mao nilang gitakdang tigum kang Neri gumikan kay ang financial adviser lang sa NEDA maoy gipaatubang kaniya ug gitambagan nga adto mopaabot sa mao niining reklamo sa International Finance Corporation (IFC).
Didto natimaohan sa mayor nga plantsado na ang maong transaksyon gumikan kay iyang nahibaw-an nga ang financial adviser nga gi-refer kaniya ang kanhi konektado kini sa Ayala Stateland.