Motor Gidaro sa V-hire; 1 patay, 4 angol

Usa ang namatay ug upat ang grabeng naangol human ang V-hire kalit midaro sa gikasugat nga motorsiklo ug milahos pa kini sa nagtapok nga mga tawong misaksi sa ballroom dancing.

Ang aksidente nahitabo alas 11 pasado ang takna sa miaging gabii sa national road sa Inuburan, Naga.

Ang namatay mao si Gilbert Cantal, 28, minyo ug ang igsuon nga naangol mao si Ramon Cantal, 29, ulitawo nga pulos taga Tinaan, Naga.

Si Teoddy Canete Pansoy, 32, taga Tinaan sa mao gihapong lungsod nga maoy nagmaneho sa maong sakyanan nga nagdala sa plate number GWR 433 nga nakadasmag sa mga biktima gitanggong karon sa bilanggoan.

Ang laing mga naangol mao sila si Dapodel Bastismo, 18, taga Inuburan, Naga, Rose Benidecto, 18, taga Tinaan ug Isidro Ceballos, 18 nga taga Langtad, Naga.

Si SPO3 Eddie Rick dela Cruz nga gikahinabi sa Banat News miingon nga kusog nga nagdagan subay sa maong dalan paingon sa San Fernando ang maong V-hire.

Sa paghidangat sa maong dapit kalit misimang ang dagan sa walang bahin sa dalan ug nadaro ang motorsiklo nga gikasugat ug namatay gayod ang usa sa mga nagluwan niini.

Human sa pagdasmag sa motorsiklo ang maong sakyanan milahos sa pagdasmag ngadto sa mga nagtapok nga mga tawo ug miangol usab sa tulo pa ka laing mga biktima.

Dugang pa ni SPO3 dela Cruz nga dali nga gidala sa South General Hospital ang mga biktima apan si Gilbert Cantal nga maoy nakabaton og grabeng kadaut sa kalawasan ang nakabsan gayod sa iyang gininhawa.