Nangilkil sa BID-7 panganlan

Gihagit ni Bureau of Immigration and Deportation-7 Regional Director Geronimo Rosas ang mga reklamante sa mga ahente sa BID-7 nga nangilkil sa mga langyaw dinhi sa Sugbo nga hinganlan kini alang sa tukmang imbestigasyon nga pagahimuon sa maong buhatan.

Matud pa ni Rosas nga "unfair" usab ngadto sa mga empleyado ug mga personnel sa BID-7 nga nagtinarong sa ilang serbisyo ug maduhig lamang sa alegasyon nga kini mihimo og pagpangwarta o pangilkil sa mga lanyaw bugti sa ilang temporaryong pagpuyo dinhi sa nasud.

Sumala pa ni Rosas nga dili siya magpanuko sa pagpasaka ug kasong administratiba sa mga malambigit sa ilegal nga kalihukan ilabi na sa pagpangharas sa mga langyaw ug dili usab siya modupa sa iyang mga tawo nga makasala sa lagda sa balaod sa imigrasyon.

Gihimong ehemplo ni Rosas ang kaso sa iyang mga ahenteng Muslim nga gilambigit sa pagpangilkil sa usa ka Indian national nga ila na kining gipasakaan og kasong administratiba ug gani anaa na sa buhatan sa Ombusdsman Visayas.

Matud pa niya nga kun kini nahitabo na sa milabay'ng mga bulan nganong karon pa kini itug-an sa mga reklamante atol sa pagkataktak ni Prosecutor Mary Ann Castro sa buhatan sa BID-7.

Kahinumduman nga usa ka reklamo ang miabot ngadto sa buhatan ni Justice Secretary Raul Gonzales ug nagtumbok sa mga ahente sa BID-7 nga mangilkil sa mga langyaw nga adunay mga deperensiya sa ilang mga dokumento ug gipangayuan og dul-an sa tunga sa milyon ka pesos bugti sa ilang padayon nga pagpuyo dinhi sa nasud ilabi na dinhi sa Sugbo hinungdan nga si Rosas gipatubag sa maong alegasyon sulod sa 72 ka oras may labot niini.