Ang pagpabaya

Ang kagamhanan sa nasud nangayo na og pakitabang sa mga nasud sa Indonesia, Japan ug Amerika aron mapalutaw pagbalik ang MT Solar I nga nalunod mga 3,000 ka tiil ang giladmon sa kadagatan sa isla sa Guimaras.

Kini human ang cost guard namahayag nga ang problema sa oil spill magpadayon kon ugaling magpabilin sa ilawom sa dagat ang oil tanker nga MT Solar I.

Matud pa ni Coast Guard Commandant Vice Admiral Arthur Gosingan nga ang Guimaras Oil Spill mao ang pinakagrabi nga nahitabo dinhi sa nasud human kini midaot sa 200 kilometros nga kabaybayonan, mihulga sa kapanginabuhian sa dul-an 20 ka mga barangay sa tulo ka mga lungsod sa probinsiya, miguba sa minilyon nga kantidad nga marine sanctuary ug mga tourist resorts ug mi-contaminate sa pagka fish productive sa maong lugar.

Ang oil spill sa Guimaras ika tulo na kini sa kasaysayan sa nasud; Una ang kaniadtong Disyembre 20, 1987 diin usa ka oil tanker nga MT Victor nga giabangan sa Caltex Philippines nga nagkarga og 8,800 ka barel nga petroleum ang mibangga sa MV Dona Paz nga mipatay og sobra sa 4,000 ka mga tripulante ug pasahero. Ikaduha nahitabo gihapon sa buwan sa Disyembre sa miaging tuig human ang barko nga gipanag-iya sa National Power Corporation ang nakayabo usab og sobra sa usa ka milyon nga litro sa bunker oil didto sa Semirara. Ug ang ika tulo ang nahitabo kaniadtong Agosto 11 ning tuiga didto sa Guimaras.

Sa mga hitabo sama sa oil spill unsa man ka andam ang nasud aron daling mapugngan ang pagkuyanap niini. Sangkap ba ang nasud sa mga gikinahanglan aron mapugngan ang pagkuyanap sa lana sa atong kadagatan? Sigon sa taho sa The Freeman aduna nay kahimanan ang atong gobyerno nga magamit alang sa pagpugong sa oil spill aron dili kini makalanat og lapad nga dapit apan nagpalingog-lingog lamang niini ang atong Coast Guard kinsa mao ang naghupot niining maong mga kahimanan. Diha pa lamang sila molihok human milabay ang pipila ka adlaw nga nalunod ang MT Solar I. Karon naglisod na sila sa pagpugong sa oil spill ug kon mapugngan man halapad na ang kadagatan nga naigo sa maong kadaut.

Ang dakong kadaot nga namugna sa oil spill didto sa Guimaras bunga sa way pagpakabana sa pagpanalipod sa atong kadagatan ug pagkatapulan sa atong mga sakop sa Philippine Coast Guard. Tungod sa kalangay sa ilang pagresponde sa hitabo bisan man toud kon napahibalo na sila niini naghimong way hinungdan sa atong mga ekipos nga gitagana na unta alang sa maong insidente. Ug tungod sa pagkatapulan sa atong Coast Guard ang nasud sa Pilipinas nagpakauwaw na sa pagpangayo og tabang sa ubang kanasuran aron masulbad ang suliran nga kon nadali pa sa pagtubag dali ra unta kini nga nasulbad.