Imbentaryo sa Inasal Festival gitugotan

Giaprobahan niadtong Huwebes sa konseho sa Talisay ang resolusyon nga nag-awhag sa City accountant nga mopahigayon og imbentaryo sa tanang napagawas nga pundo ilabi na sa nagamit sa Inasal Festival.

Ang City accountant giawhag usab sa konseho nga mosumiti sa imbentaryo 15 ka adlaw gikan sa pag-aproba sa nahisgutang resolusyon.

Si Konsehal Alan Bucao kinsa maoy nangamahan sa resolusyon nagkanayon nga ang kagamhanan sa dakbayan kinahanglang mo implementar og mga policy kabahin sa interest sa publiko ilabi na sa tanang transaksiyon niini.

Ang mga kawani sa kagamhanan kinahanglang magmatinud-anon sa ilang serbisyo ug magdaginot ilabi na sa pundo sa panudlanan sa gobiyerno ni Bucao pa.

Si Bucao misentro sa statement of expenditures sa inasal festival sa milabay'ng tuig diin adunay unliquidated items niini.

Base sa report nga gilagdaan ni Viluzminda Villarante, City accountant sobra sa P3.1 milyones ang nagasto sa inasal festival ug ang P500 mil niini ang nagpabilin pa nga wala ma-liquidate.

Apan bisan pa og nakapakita og liquidation ang accounting sa nagasto sa festival, si Bucao nagduda tungod kay wala kini supporting documents o voucher nga gilakip niini.

Matud ni Bucao nga para sa pagsuporta sa nabayaran na nga items kinahanglang aduna kini supporting documents o vouchers nga magahatag og reconcile sa kantidad nga natala sa expenditures report.