Duha gipareglahan

Duha ka mga lalaki ang nalandig sa tambalanan human sila kulataha ug gipusil sa pundok sa mga batan-on diha sa may parking lot sa Pump Disco sa Grand Convention Center sa dalan Archbishop Reyes sa barangay Luz ning dakbayan kagahapon sa kaadlawon.

Ang mga biktima giilang sila si Harold Dy Saday, 26, usa ka negosyante ug residente sa Casili lungsod sa Consolacion ning dakbayan samtang ang kauban niini mao si Rommel Yamomo Villomo,25, taga Sudlon, Maguikay dakbayan sa Mandaue.

Sa imbestigasyon ni SPO2 Rey Cuyos sa Homicide Section mitumaw nga ang mga biktima uban sa higalang si Leovigildo Yu gikan pa sa maong diskohan ug padulong na mamauli dihang kalit nga may mitugpang botelya diha sa ilang tungod diha sa parking lot.

Usa sa mga batan-ong nagpundok diha sa daplin ang miduol sa grupo ug nangutana kung kang kinsa ang botelyang gilabay, apan dihang mihimakak ang mga biktima kalit silang gipangsukmag. Ang mga kaubanan sa batan-on gikatahong midasmag usab, maong midagan ang tulo ngadto sa ilang sakyanan aron unta moikyas.

Apan wala pa sila makagawas sa parking lot kalit nga mipaka ang sipang buto diin si Sadaya naigo sa iyang likod samtang nasamdan usab si Villomo.

Ang duha daling gidala ngadto sa North General Hospital samtang si Villomo nakagawas ra dayon sa maong tambalanan tungod kay dili grabe ang igo niini sa ulo.

Niadtong milabayng Biyernes sa kaadlawon usa ka Rey Gonzales ang nalandig sa tambalanan human kulataha dayong gidunggab sa grupo sa mga batan-ong namaregla kaniya ug sa duha pa niya ka mga kauban diha sa maong lugar.