Ang biktima giilang si Dennis Tabay Bacarias alyas Chenet, 22, tinun-an sa kursong automotive ug kasamtangang nagpuyo sa maong lugar.
Gitumbok nga mipusil kaniya mao si Wilfred Dacalos Cabaluna Jr. alyas Welo,18, silingan sa biktima ug ka-brod niini sa Crips gang.
Sumala pa sa imbestigasyon ni SPO2 Rey Cuyos sa Homicide Section ang biktima uban sa iyang uyab nga si Marie (apelyedo gipugngan),17 anyos ug duha pa ka mga higalang babaye ug lalaki dihang kalit nga mibutho si Cabaluna diha sa luyo sa grupo.
Ang suspek walay daghang pahibalo kalit nga mipusil sa biktima kinsa nagtalikod nga naglakaw makausa ginamit ang wala matinong kalibre sa armas ug dihang nalimbuwad ang biktima giduol kini sa suspek ug giusban og pusil.
Nasuta sa mga imbestigador nga si Cabaluna ug Bacarias bisan managkauban sa Crips gang dugay na kining walay pagsinabtanay nga nasangpot sa panagdumot.
Ang biktima naigo diha sa iyang ulo, tiyan ug tuong abaga, patay kini diha-diha, ang suspek daling miikyas palayo sa dapit ug hangtud karon gipangita pa sa kapolisan.
Sa paghiling sa grupo sa Scene of the Crime Operation 7 dunay gitak-in sa hawak ang biktima nga .38 rebolber paltik nga may tulo ka buhing bala.
Wala na diha sa iyang balay ang suspek dihang gisusi sa kapolisan human sa insidente.