3 angol sa gubot duol sa diskohan

Tulo ka mga lalaki ang gipangkulata usa kanila gidunggab sa pundok sa mga batan-on diha sa atubangan sa usa ka diskohan sa Grand Convention Center sa dalan Archbishop Reyes sa barangay Luz ning dakbayan.

Ang nangaangol ug nalandig sa Cebu Doctors Hospital giilang sila si Rey Gonzales,28, usa ka furniture factory supervisor ug duha ka kaubang sila si Joel Suico,24, ug Michael Cagampang, 24, pulos nagpuyo sa Talamban ning dakbayan.

Sumala pa sa imbestigasyon ni SPO3 Alex Dacua sa Homicide Section ning dakbayan, ang tulo kasamtangang nagpaabot og taxi diha sa gawas sa Pump Disco sa nahisgutang lugar dihang kalit nga giduol sa grupo sa mga batan-on.

Ang mga suspek kalit nga mikulata sa mga biktima sa walay igong hinungdan maong ang tulo nanagan apan si Gonzales nga nahibilin maoy naabtan sa usa sa mga batan-on ug gitampokan ang likod niini og kutsilyo.

Ang mga suspek daling mikaratel og dagan palayo sa maong lugar samtang ang tulo diha na mag-abot sa emergency room sa tambalanan gumikan sa samad dinunggaban ni Gonzales ug ang mga bun-og ug pangos sa mga kauban niini.

Nagduda ang kapolisan nga gipareglahan ra ang mga biktima sa grupo sa mga batan-on. Mao na kini ang ikaduhang higayon nga dunay gipareglahan diha sa maong dapit sulod lang ning milabay'ng tulo ka semana.