6 nahilo sa barongoy; 1 patay

Usa ang namatay sulod sa tambalanan sa unom ka managsuon nga pulos minor de edad human nagsuka kalibang kay nakakaon og isda nga barongoy.

Ang insidente nahitabo niadtong Miyerkules human sa ilang paniudto nga pulos nagmulo sa kasakit sa ilang mga tiyan, pagkataud-taud nag-iyahay na lang sa pagsuka ug kalibang sa ilang panimalay diha sa Sitio Combado, Cantuod, Balamban.

Daling gidala sa ilang mga ginikanan sa Balamban District Hospital apan ang tulo sa unom nakagawas ra pila ka oras ang milabay kay wala kaayo magrabehi sa ilang pagsuka-suka.

Ang namatay giila nga si Jessie Condrado, 6, samtang ang duha mao sila si Roger Jose, 11, ug Jomar Jose, 13, pulos mga residente sa nahisgutang lugar.

Si Dr. Jonathan Bendebel sa Balamban District Hospital nga nahinabi pinaagi sa telepono ning tigbalita nagkanayon nga nagsuka-suka ug nagkalibang ang mga bata tungod sa kagaw nga mitakboy sa isda nga barongoy nga ilang napalit gikan sa merkado publiko niadtong Miyerkules.

"Nakapalit man kuno ni sila og isda unya ilang giluto mao pud ilang gikaon, unya maoy gipasanginlan nila kay nagsakit naman ilang tiyan. Pero sa among findings diri nakakaon gyud ni sila og kagawon, mao nay akong gibutang sa death certificate aning namatay. Electrolite embalance due to severe diarrhea ang hinungdan," asoy ni Dr. Bendebel

Si Jessie nakabsan sa iyang kinabuhi pagka Huwebes sa hapon gumikan sa grabeng pagsuka kalibang.

Samtang ang duha karon anaa pa sa district hospital ug padayon pang giatiman sa mga doktor hinuon matud ni Dr. Bendebel nga luwas na sa makuyaw nga kahimtang.

Gisuwayan unta sa pakighinabi ang inahan sa mga menor de edad pinaagi sa telepono apan pakyas kay giingong wala na diha sa tambalanan kay matud pa niuli na sa ilang panimalay.