Torres nakonbikto nasab

Sa ikaduhang higayon nakonbikto na usab ang notadong tulisan og bangko nga si Rey Ruth Torres alyas RR, ning higayuna kabahin sa pagtulis sa EastWest Bank niadtong bulan sa Enero sa tuig 2004 diha sa Ayala Business Park.

Si RTC Branch 21 Judge Eric Menchavez misentensiya kang Torres sa pagkabilanggo og di molapas sa unom ka tuig ug usa ka adlaw apan di momenus sa duha ka tuig, upat ka bulan ug usa ka adlaw nga pagkabilanggo.

Ang desisyon nahukman niadtong Huwebes diha sa sala ni Menchavez diin gikatakda untang mopresentar ang prosekusyon og dugang ebidensya pinaagi ni Assistant City Prosecutor Leceria Rabillas.

Apan ang manlalaban ni Torres nga si Atty. Elmer Pacayra sa Public Attorney's Office (PAO) subay usab sa kabubut-on sa akusado nga mosulod kini sa 'plea-bargaining' agreement.

Matud pa sa desisyon, si Torres buot nga moangkon sa pasangil kun dili siya hukman og molapas sa unom ka tuig ug usa ka adlaw nga pagkabilanggo.

Ang prosekusyon misumiter sa maong tinguha ni Torres ngadto sa korte diin kini gitugutan usab pinaagi sa pagpahigayon og re-arraignment diin iyang giangkon ang maong salaod.

Dihang gipangutana sa korte kung wala ba siya (Torres) pugsa sa si bisan kinsa aron angkunon ang salaod, si Torres nagkanayon nga iyang kabubut-on ang maong desisyon.

Si Torres gihukmang sad-an sa kasong robbery sa pagpanulis sa East West Bank nga nakit-ang paglapas sa Revised Penal Code Artikulo 294 paragraph 5.

Gawas sa pagkabilanggo gimandoan usab si Torres sa pagbayad og P470,429.92 ngadto sa East West Bank.

Si Supt. Pablo Labra sa Criminal Investigation and Intelligence Branch sa Cebu City Police Office kinsa maoy nangulo sa grupong midakop kang Torres didto sa Aurora sa Mindanao nagkanayon nga usa kini ka pagmatuod nga dili gyud makalingkawas sa hustisya.

Matud pang Labra nga nasayod na si Torres nga kung di siya moangkon sa salaod mas bug-at pa gyud ang silot nga posibleng mapahamtang kaniya.

Si Torres dunay siyam ka mga kasong pagpanulis dinhi sa Metro Cebu lakip na niini ang robbery with homicide nga nahitabo sa dakbayan sa Mandaue.

Dili palang dugay gikombikto usab sa korte si Torres tungod sa pagtulis sa PenBank sa Tabunok, dakbayan sa Talisay, nakuha atol sa hitabo ang P850,000.