Mipusil sa CIDG men 'patay

Ang namatay giilang si Jayvee Miag-ao, hingkod ang panuigon ug nagpuyo sa Cansaga, Consolacion usa ka sakop as Tau Gamma Phi fraternity ug gidudahang bigtime drug pusher diha sa maong dapit.

Si Miag-ao maoy gitumbok ni Dante Halang nga maoy mipusil nila ni SPO1 Reynaldo Matillano ug PO3 David Enterina sa CIDG7 nga maoy nagpakaaron ingnong mopalit og shabu kaniya niadtong Hunyo 27, 2006 sa kaadlawon diha sa sitio Simborio, Tayud Liloan.

Dunay nagpaabot nga warrant of arrest ni Miag-ao gumikan sa kasong pagpatay, ang warrant of arrest giisyu ni RTC Judge Silvia Paderangga.

Sumala pa ni SPO1 Delfin Bontuyan sa pakighinabi sa Banat News nga sukad pa niadtong milabay'ng Lunes nila mahibaw-ing si Miag-ao diha mitago sa maong dapit apan wala nila matultuli kung asa ang balay nga gitaguan niini.

Kagahapon ang grupo ni Chief Inspector Fermin Armendares human makumpirmar gikan sa ilang asset ang presensya ni Miag-ao ila kining giadto aron unta dakpon.

Apan sa wala pa makanaog ang kapolisan kalit nga gipusil ni Miag-ao ang sakyanan nila ni Bontuyan nga Toyota Revo sa CIDG7 diin naigo ang pultahan niini tupad sa gilingkuran ni Bontuyan kinsa mao usab ang nagmaneho, ang bala diha miagi ubos sa bitiis ni Bontuyan.

Ang mga kauban ni Bontuyan mao nay mibawos og pusil kang Miag-ao nga naigo sa ulo, dali siyang gidala ngadto sa Moalboal district hospital ug gidala sa Vicente Sotto Memorial Medical Center apan gideklarar kining dead on arrival.

Nakuha gikan kang Miag-ao ang usa ka fragmentation grenade ug usa ka kalibre 45 pistolang may upat pa ka buhing bala.

Lakip sa gidakop mao si Rex Sibumit alyas Chicong nga taga Villagonzalo 2 sa Tejero ning dakbayan nga maoy gitumbok nga kauban ni Miag-ao niadtong nahitabo ang pagpamusil sa duha ka sakop sa CIDG7.

Gidakop usab ang kapuyo ni Sibumit nga si Laura Jane dela Cruz ug Arnel Gartulfo gumikan sa pagtago nila kang Miag-ao.