Vigilante padayon gihapon — Homicide

Dili motuo ang Homicide Section nga hingpit nang mihunong ang operasyon sa mga gidudahang vigilante dinhi sa dakbayan sa Sugbo apan matud pa ang pagdagsang sa daghang mga polis dinhi sa Sugbo maoy hinungdan nga nahunong kini.

Si Inspector Erlando Metante ang acting chief sa Homicide Section nagkanayon nga 'mi-lie low' ang mga vigilante tungod sa nakitang daghang mga polis diha sa kadalanan.

Daan nang namahayag si Cebu City Police Office acting director Melvin Gayotin nga usa sa iparang niya sa mga vigilante mao ang pagpakatap og mga polis diha sa kadalanan ug mga random checkpoints nga sagad karong makita dinhi sa dakbayan.

Ulahing nabiktima sa mga vigilante nahitabo niadtong Hulyo 18 diha sa dalan F.Gonzales sa Sto. Niño ning dakbayan diin usa ka Darnel Catalan, 31, residente sa Bayong, Tisa ning dakbayan ug nanginabuhi pagtinda og utanon diha sa maong merkado.

Samtang naangol usab sa saag nga bala ang laing tindera nga si Amparo Bernil, 50, nga residente sa gikahitaboan.

Base sa imbestigasyon sa Homicide Section ang biktima kasamtangang naglakaw diha sa nahisgutang dalan dihang kalit nga giduol sa usa ka wala mailhing lalaki dayong gipusil gamit ang wala matinong kalibre sa armas de fuego makadaghang higayon.

Sagad nga modus sa mga vigilante mao ang paggamit og motorsiklo ug kalibre 45 nga pistola, ang duha ka sakay niini magsuot og bonnet ug helmet.

Ning mga miaging mga adlaw dunay mga biktima sa pagpatay susamang gikopya ang pamaagi sa mga vigilante apan sa imbestigasyon nasubay nga personal nga kaaway sa mga biktima ang mga suspek.

Niadtong milabay'ng Martes sa hapon usa ka ex-convict nga si Malvin Labrado ang gitumba diha sa A. Lopez Extension sa Labangon.

Nasayran nga dunay gikaaway nga mga batan-on si Labrado duha na ka adlaw ang milabay ug maoy gituohang motibo sa pagpatay kaniya.

Sukad niadtong Disyembre 22, 2004 duna nay 167 ka mga biktima sa mga vigilante sagad kanila nga kanhi ex-convict ug dunay mga rekord pagpangawat, tulis, murder ug drugas.