Text, call paminusan

Mi-apelar ang mga opisyal sa siyudad sa Sugbo ngadto sa higanting mga telecommunications company nga paminusan ang presyo sa mga text messaging ug call services ngadto sa publiko.

Sigun sa report ang Globe og Smart company dagko kaayo kini og income gumikan sa minilyon niining mga subscriber sa text ug call services.

Gawas niini, gihulagway pa nga mas taas ang text messaging ug call rates dinhi sa nasud kon itandi sa mga nasud sa Singapore, Hongkong ug Malaysia.

Gumikan niini, tukion atol sa sesyon sa konseho sa dakbayan sa Sugbo karong Miyerkules ang gipasar nga resolusyon ni Konsehal Edgardo Labella, tsirman sa committee on laws nga nag-awhag sa mga nahisgutang telecommunications company sa pagpaminus sa presyo niini.

Gisukip diha sa maong resolusyon ni Labella ang pag-awhag sa National Telecommunication Company (NTC) nga maoy mopatunga ning maong isyu pinaagi sa pagpakig-negosasyon sa Globe ug Smart aron mapatuman ang makatarunganon nga presyo sa text ug call services dinhi sa nasud.

Gibasehan sa konsehal ang Akta Republika 7925 kon Public Telecommunication Policy Act of the Philippines.

Gipadayag sa konsehal nga ubos ning maong balaod gihatagan og gahum ang NTC pagpanalipod sa interes sa mga konsumidor batuk sa mga pagpangabuso nga himuon sa mga telecommunications company sama sa pag-monopoliya niini.

Giangkon sa konsehal nga makatampo og dako sa ekonomiya sa nasud ilabi na sa Sugbo ang maayong operasyon sa mga pamatigayon apan dili usab angay pasagdan ang interes sa publiko.

Dinhi sa nasud dunay gibanabanang mokapin sa 26 milyones ka mga cellphone subscribers.