Gipusil upat ka higayon

Patay na nga napalgan sa usa ka manindahay og isda ang usa ka tawo nga gipusil upat ka higayon didto sa Sitio Kapaz, Catarman, Liloan sa milabay'ng gabii.

Ang biktima mao si Jason Navarro Oteda, 25, ulitawo ug nagpuyo sa Sitio Suba, Poblacion, Liloan.

Base sa pasiunang imbestigasyon ni PO3 Marcelino Servilla sa Liloan Police Station nasayran nga mga alas 11:55 sa milabay'ng gabii upat ka buto sa armas ang ilang nabati ug usa ka manindahay og isda ang nakadiskubre sa patay 'ng lawas ni Oteda.

Ang nahisgutang mamaligyaay og isda maoy mitaho ngadto sa Barangay Hall sa Poblacion ug ang mga tinugyanan niini maoy mitawag sa kapolisan sa Liloan.

Atol sa pagresponde ni SPO2 Rufino Grancho ang biktima adunay upat ka samad pinusilan sa iyang ulo ug dughan hinungdan sa hinanaling kamatayon niini nga wala na gani madala sa tambalanan.

Hangtod ning pagsuwat ning balita wala pa masayri kun kinsa ang responsable sa maong pagpamusil ug ang kalibre sa armas nga gigamit sa pamusil.

Matud pa ni PO3 Servilla ila pang gisusi ang rekord sa maong biktima human nga pipila ka residente sa maong dapit nahitabuan nagtuo nga usa ka vigilante-style nga pagpatay sa biktima.

Usa sa gisubay karon sa kapolisan nga may kalambigitan ang gubot sa fraternity.