Sikyu napalgang patay

Usa ka gwardiya sa usa ka baligyaanan og awto diha sa dalan F. Cabahug, Mabolo napalgang patay ug may samad pinusilan diha sa iyang suwang agi sa pusil kagahapon sa buntag.

Ang biktima giilang si Richard Labor,hingkod ang panuigon sakop sa Versatile Security Agency ug nakadestino sa Ayala Motor Sales sa naasoy'ng lugar.

Sumala pa sa imbestigasyon ni SPO3 Zenaido Pastorfide sa Homicide Section ang stay-in nga mekanikong si Boyet Maoy, 21, nakadungog og sipang buto diha sa gikahimutangan sa biktima nianang pagka alas 4 sa kaadlawon.

Apan sa pagtuong nagtesting ra sa iyang armas si Labor wala na niya kini panumbalinga.

Laing nakasaksi mao ang usa ka Jordy Camangyan, gwardiya usab sa usa ka tindahan duol sa gikahitaboan kinsa nakadungog usab sa buto sa armas.

Dihang iyang gisusi usa ka lalaking nagsuot og kolor puti nga t-shirt ug dirty-white nga short pants ang iyang nakit-ang nagsulod gawas sa gikahitaboan.

Ang biktima diha na magbuy-od sa luyong bahin sa usa sa mga gidisplay nga sakyanan, gawas sa samad diha sa iyang suwang agi sa pinusilan duna pa kini laing samad diha sa tuong aping ug walang tunga-tungang tudlo.

Nasuta nga si Labor igo rang mihulip sa miabsent nga gwardiyang giila lang nga si Montalban tungod kay nagsaulog ang naulahi sa iyang birthday.