Batan-on gi-vigilante sa Duljo

Patay ang usa ka batan-on human kini pusila susama sa estilo sa mga vigilante diha sa dalan Spolarium, Duljo-Fatima ning dakbayan niadtong milabay'ng gabii.

Ang biktima giilang si Joveniel Mandawe,18, residente sa sitio Lubi sa nahisgutang barangay, nakabsan sa iyang kinabuhi pipila ka gutlo diha sa Cebu City Medical Center gumikan sa daghang samad nga naangkon sa iyang kalawasan.

Duha ka wala mailhing lalaking pulos nagsuot og maskara nga gisapawan og helmet luwan sa usa ka kolor blue nga motorsiklong walay plaka ang gitumbok nga mipusil sa biktima.

Sumala pa sa imbestigasyon sa Homicide Section ang biktima kasamtangang naglakaw sa nahisgutang dalan dihang miabot ang mga suspek ug ang backrider mikanaog og miduol sa biktima.

Ang backrider kalit nga mibunot og wala matinong kalibre sa armas de fuego ug gipusil si Mandawe makadaghang higayon diha sa nagkadaiyang parte sa iyang lawas.

Human sa pagkahagba ni Mandawe yanong milakaw ang suspek balik sa nagpaabot nga kauban ug dayong miikyas padulong sa direksyon sa Pasil.

Ang higala ni Mandawe nga si Anthony Tojeno maoy daling midala sa biktima ngadto sa CCMC apan nakabsan gihapon kini sa iyang kinabuhi.

Nasuta sa imbestigasyon sa Homicide Section nga dunay kaaway nga ginganlan og Jun Lulu si Mandawe nga taga sitio Punyang sa samang barangay.

Gikatahong magkanunayan kining moanha sa pinuy-anan sa biktima ug mangita kaniya, apan wala pa matino sa kapolisan kun may kalambigitan ba ang maong tawo sa kamatayon sa biktima.