Nang-spray og pepper gidakop

Usa ka babaye gidakop sa mga gwardiya sa usa ka pribadong tambalanan human kini gikatahong mipasirit og pepper spray ngadto sa iyang mga paryenteng iyang gikaaway sulod mismo sa emergency room sa maong tambalanan niadtong Biyernes sa hapon.

Ang gidakop giilang si Bonafe Karoway, 36, biyuda, nga taga Velpal Subdivision sa Minglanilla, human niya ipasiriti og pepper spray ang magtiayong David ug Naomi Benida.

Sumala pa sa imbestigasyon sa Fuente Police Station nga si Karoway uban sa iyang langyaw'ng uyab nga mianha sa emergency room ug buot untang mosulod uban sa iyang langyaw'ng uyab tungod kay ang inahan sa mga biktima nadangat didto.

Apan si David wala motugot nga pasudlon ang uyab sa suspek hinungdan sa ilang panaglalis, ning tungora gikatahong nahitabo ang linayugay tali nilang duha.

Nianang tungura si Karoway mikuha og pepper spray ug gipasiritan ang managtiayon hinungdan sa ilang temporaryong pagkabuta sulod sa kinse ngadto sa 20 minutos.

Lakip sa naapektahan sa baho sa kemikal sa spray mao ang mga nurses, kliyente ug mga pasyente nga nakasinati usab og paglisod sa pagginhawa ug maglipong-lipong.

Ang komosyon namatikdan sa mga gwardiyang sila si Eleto Prudencio ug Santiago Cueva kinsa daling midakop kang Karoway ug gidala ngadto sa Fuente Police Station alang sa posibleng pagpasaka og kasong slight physical injuries, alarm and scandal.