Nakaangkon og mga samad pinusilan sa dughan ug ubang parte sa lawas si Gaspar Honales, 22, taga Villagonzalo niining dakbayan sa Sugbo ug daling gidala sa Talisay District Hospital apan tungod sa iyang kahimtang gibalhin sa Vicente Sotto Memorial Medical Center ning dakbayan.
Ang namusil kinsa sakay sa usa ka multicab nga nagtangag sa plakang GWY-281 daling miikyas human sa maong hitabo ug wala miilhi sa mga otoridad ang pangalan niini.
Si PO2 Alan Villazurda mibutyag kagahapon sa Banat News nga gibadlong ni Honales ang suspetsado tungod kay hubog na kaayo ug nagdumili kini sa pagbayad sa ladies drink nga iyang gi-order ug nakiglalis sa mga silbidora.
Mibahad ngadto ni Honales ang suspetsado nga mobalik ug ang tag-iya sa maong KTV bar mipasidaan sa biktima nga dili mokompiyansa.
Atol nga misirado na ang KTV bar nabalik gyud ang suspetsado nga wala na magsakay sa iyang multicab ug miduol kini ni Honales ug nangayo pa kini og pasensiya sa nahitabong kagubot.
Hinungdan nga mihatag og kompiyansa si Hornales apan sa iyang paglingiw kalit siyang gipusil sa supetsado ug pagkatumba sa biktima giusban pa gyud kini.
Matud ni PO2 Villazurda nga adunay nakataho kanila kabahin sa suspetsado nga midagan paingon diha sa flyover apan wala gyud kini nila maapsi ug padayon pa nila kining gipangita.