Text hotline gamiton sa NPA

Nagkingking kanunay ang kapolisan sa kalungsoran sa "mid-north" ning lalawigan pagtimbangtimbang kutob sa madawat nilang mga report pinaagi sa cellular phone.

Mao kini gibutyag ni Senior Inspector Camilo Gonzaga, hepe sa kapolisan sa Tabuelan Police Station kinsa nagkanayon nga human nila ikataod ang ilang streamer niadtong miaging semana, gituohan nilang masinag-o na ang 09188277630 nga maoy ilang numero para sa publiko.

Matud pa ni Gonzaga nga nagpabilin ang ilang kabalaka base sa daan nang gipahimangno kanila ni Supt. Vicente Loot, hepe sa Cebu Provincial Police Office nga basin abusahan kini sa mga rebelde.

Maoy hinungdan nga kutob sa madawat nilang mga tawag sa cellphone ila gyung siguroon kon kini gikan ba gyud sa mga lihitimong mga "caller", matud pa ni Gonzaga.

Midugang usab ang hepe sa kapolisan sa Tabuelan nga tanang mga kapitan sa barangay nga may cellphone, misumiter na og numero kanila, alang sa dinalian nilang pagkinontakay sa panahon nga may importanteng mga report o hitabo sa palibot.

Ang Tabuelan usa sa mga lungsod sa mid-north nga kanunay'ng gihulga sa mga rebelde.

Matud pa ni Gonzaga gipili usab nila pag-ayo ang mga miyembro sa ilang barangay intelligence network (BIN) aron pagsiguro nga tanang impormasyong mahipos niini ikataho dayon ngadto sa kapolisan.