Krimen sa Central Visayas angay'ng tutukan

Gimandoan ni Philippine National Police Director General Oscar Calderon ang mga opisyal sa Police Regional Office-7 nga hugtan ang kampanya batok sa kriminalidad human namatikdi ang pagsaka sa crime volume sa rehiyon.

Si Calderon namulong atol sa PC/INP Recognition Day kagahapon ug nagkanayun nga ang rehiyon 7 dunay taas nga crime volume sa unang kwarter ning tuiga samtang ubos usab ang solution efficiency.

Matud pa ni Calderon nga gikinahanglan ang dugang police visibility ilabi na sa kagabhion human nasuta nga kadaghanan sa kriminalidad nahitabo sa gabii.

Nasayran nga unang nigawas sa The Freeman (igsoon sa Banat News) ang taho niadtong Hulyo 30 nga nagbutyag nga ang Central Visayas mao karon ang maisip nga most dangerous region sa Pilipinas.

Apan giklaro ni Calderon bisan taas ang crime volume sa rehiyon, wala kini magpasabot nga delikado na nga puy-an ang rehiyon.

Gani, gitumbok ni nga ang Sugbo mao ang pahigayunan sa ASEAN Summit karong Disyembre gumikan sa maayong kahimtang sa kalinaw ug kahusay.

Bisan mga petty crimes ang nahitabo sa Sugbo, sumala pa ni Calderon nga kinahanglan gihapon nga doblehon sa kapolisan ang kampanya batok sa tanang matang sa kriminalidad.

Apan si PRO-7 director, C/Supt. Silverio Alarcio, Jr. miingon nga ang gibasehan ni Calderon mao ang first quarter samtang minus na ang second quarter.

Gipakagamay ni Alarcio ang nahaunang taho sanglit nasuta usab nga nagkadaghan ang mga nangabot nga turista sa rehiyon isip numero unong suruyanan sa nasud gumikan sa kamalinawon.