'Oil spill' sa Lapu-Lapu

Laing gipaawas nga lana sa kadagatan ang nadiskubrehan gikan sa usa ka shipyard sa dakbayan sa Lapu-Lapu human sa laing insidente nga giingong gikan sa usa ka shipyard sa barangay Sangat, lungsod sa San Fernando.

Ang duha ka insidente sa pagpaawas sa lana sa kadagatan ang nakapaalarma na kaayo sa mga environmentalists ug mga mananagat sa kabalaka nga makadaut kini sa mga buhi sa kadagatan.

Ang gipaawas nga lana sa kadagatan sa dakbayan sa Lapu-Lapu giingong nagagikan sa Keppel Shipyard.

Gikompirmar ni Commodore Alejandro Flora sa Philippine Coast Guard Central-Eastern Visayas nga may gipaawas gyud nga lana sa kadagatan gikan sa maong shipyard.

"There were around 20 liters of oil that were accidentally spilled into the sea water at the Keppel Shipyard," matud pa ni Flora.

Matud pa ni Flora nga iya na nga gimandoan ang Maritime Environmental Protection Unit (Mepu) sa Coast Guard sa pagpahigayon og imbestigasyon sa Keppel Shipyard aron masayran ang tinuod nga hinungdan sa pag-awas sa lana ngadto sa kadagatan.

Gipahibawo usab ni Flora nga gilimpyohan na sa mga tawo sa shipyard ang gipaawas nga lana.

Apan giklaro ni Flora pahamtangan gihapon og multa ang shipyard diin ang kantidad magdepende sa resulta sa imbestigasyon sa Mepu.