Duha ka delegado sa ABAC nalimbuwad

Magtiayong Koreyano nga uban sa mga delegadong mitambong sa Asia Pacific Economic Council (APEC) Business Advisory Conference (ABAC) ang nalimbuwad samtang nagduwa og golf sa Alta Vista golf club sa Pardo niadtong Sabado.

Ang duha giilang sila si Jay Soon ug Jessica Soon, pulos hingkod ang panuigon ug lumad nga taga South Korea. Ang duha kabahin sa kapin 300 ka mga delegadong miabot dinhi sukad pa niadtong Agosto 9 alang sa ABAC diha sa dakbayan sa Lapu-Lapu.

Sumala pa sa incident report gikan sa Pardo police station ang duha miapil sa kompetisyon sa 3rd ABAC tournament 2006 diha sa maong dapit dihang nahitabo ang aksidente.

Ang duha luwan sa usa ka golf cart nga gimaneho ni Jay Soon padulong sa Hole number 11 dihang wala damha nawad-an og kontrol si Soon sa ilang gisakyan ug nakaingon sa pagkalagpot nilang duha.

Ang nag-estambay nga mga paramedics nga sila si Henry Go ug Mark Apostol maoy daling mitabang sa duha ug gihatagan og first aid gumikan sa naangkong bun-og ug pangos ingon man samad sa duha.

Hinuon dili kaayo grabe ang naangkong kadaut sa duha sanglit human sila mahampuli og tambal mipadayon pa sila sa ilang torneyo.

Ang kapolisan mipakatap og libuang mga polis sa tibuok Metro Cebu alang sa maong kalihukan aron pagsiguro sa kaluwasan sa mga bisita hangtud sa pagtapos sa ABAC karong Agosto 16.