Moretiro, mopapiling Kongresista si Ouano

Saulugon karong adlawa ni Mandaue City Mayor Thadeo Ouano ang iyang edad sa pagretiro nga 60 anyos sa iyang kinabuhi.

Apan wala kini magpasabot nga moretiro na usab siya pagserbisyo sa mga Mandauehanon.

Gani sa niaging adlaw, gipahibawo ni Ouano ang iyang plano human sa iyang tulo ka termino isip mayor sa dakbayan sa Mandaue nga moretiro o mopapili ba sa pagka-kongresista sa ikaunom nga distrito sa lalawigan sa Sugbo.

Matud pa ni Ouano nga wala siya'y laing plano kon ugaling magpabilin siya sa politika gawas sa pagpapili sa pagka-kongresista.

Kini gumikan kay duha sa iyang mga anak nga sila si konsehal Alfred Francis Ouano sa lungsod sa Consolacion ug Jonkie Ouano ang iyang tabangan sa umaabot eleksiyon.

Si Jonkie nga karon special assistant ni Teddy maoy gihugun-hugunan nga padaganon sa pagka-mayor sunod eleksiyon.

Gipasabot ni Ouano nga kon moretiro man siya sa politika, iya nalang tabangan ang duha niya ka anak nga anaa sa katungdanan.

Usa sa agenda ni Ouano kon mopapili sa pagka-kongresista mao ang pagpadayon sa plano nga mahimong lone congressional district ang dakbayan sa Mandaue nga una nang giduso ni kanhi Kongresista Efren Herrera.

Matud pa ni Ouano nga suportado sa tanang sektor lakip na sa oposisyon ang maong tinguha ni Herrera sanglit kwalipikado na ang syudad nga makaangkon og usa ka kongresista.

Gipasabot ni Ouano nga angayan na nga may modala sa tingug sa Mandauehanon ngadto sa Kongreso.