Kooperasyon sa tanan — Arroyo

Si Presidente Gloria Macapagal Arroyo mibutyag nga ang nasud dili makasugakod sa tanang hulga ilabi na sa ekonomiya ug siguridad.

Matud pa niya nga kinahanglang dunay kooperasyon tali sa ubang kanasuran ug sa relasyon sa private-public nga sektor, kini maoy tipik sa iyang pamahayag atol sa pagbukas sa Asian Pacific Economic Cooperation (APEC) Business Advisory Council conference nga gipahigayon kagahapon diha sa Shangri-La Hotel Resort sa dakbayan sa Lapu-Lapu.

Matud sa Presidente nga importante usab ang siguridad sa enerhiya ug miawhag kini sa mga lider sa magpapatigayon sa Asia-Pacific region nga wagtangon ang tanang babag sa ekonomiya.

Sa unang mensahe sa Presidente, iyang gisentro ang pagkahimong miyembro sa Pilipinas sa APEC ug sa Association of Southeast Asian Nations nga dako'g natabang sa pag-uswag sa ekonomiya sa nasud ug sa relasyon sa ubang kanasuran.

Ang Presidente nagkanayon nga ang rehiyon nag-atubang karon og mga pagpanghulga sa ekonomiya sa rehiyon, hulga sa terorismo, epidemiya ug mga katalagman ug sa seguridad sa mga suplay ug tinubdan ilabi na sa enerhiya ug mga mineral.

Gitataw sa Presidente nga dili makasakbang ang nasud sa mga nahisgutang hulga, nanginahanglan kini og ayuda gikan sa ubang kanasuran ug sa mga langyaw nga institusyon.

Gihisgutan usab ni Arroyo ang kabahin ASEAN summit niining tuiga diin ang Pilipinas maoy mo-host.

Ang kagamhanan sa nasud moduso og mga pamaagi nga makapahimo sa ASEAN nga usa ka masidlakong institusyon nga naghatag og pakabana sa katawhan kinaiyahan.

Gibutyag usab sa Presidente nga ang pagtaas sa presyo sa lana nakapasamot sa kalisod sa mga kabus hinungdan nga ang kagamhanan nangita og laing alternatibo nga tinubdan sa enerhiya.

Ang kagamhanan mideklara og usa ka "war of independence" sa lana ug gipaningkamotan sama sa Brazil nga nahimong self-sufficient sa bio-fuels.

Niadtong Biyernes diha sa Shangri-La ang Ford Philippines milusad sa "ford Focus Flexicar" usa ka sakyanan nga ang makina pwedeng mapadagan gamit ang gasolina nga gisagolan og ethanol.