8 ka mananagat giluwas sa O-Jet

Human sa tulo ka oras kapin nga pag-utaw-utaw sa dagat naluwas ang walo ka mga sakay sa motor bangka human malunod diha sa kadagatan sa Bagacay Point Liloan alas 8 kagahapon sa buntag.

Ang Ocean Jet gikan sa dakbayan sa Sugbo paingon sa Hilongos Leyte maoy nakabangal sa walo ka mga pasaherong sakay sa Gio Gril nga dunay karga nga "guso" gikan pa sa Hilutungan island, ug paingong mohatod sa dakbayan sa Mandaue

Ang walo ka mga pasahero mao sila si Jim Cabrera, Roy Gorion, Ariel Romon, Sal Alura, Romeo Balani, Junjun Serenio, Ricky Diaz ug Froilan Romo, ang walo pulos nanimuyo sa Hilutungan island.

Ang kapitan sa Ocean Jet 1 nga si Cecilio Baroc nagkanayon nga nagdagan sila sa 4.5 nautical miles sa Bagacay Point ug ilang nakita ang mga tawo nga naglutaw lutaw sa dagat hinungdan nga dali niyang gipahibalo ngadto ni Bernard Maraasin ang manager sa Ocean Jet.

Si Maraasin nga nahinabi sa Banat News miingon nga gidala nalang ang walo ka mga pasahero sa ilang barko ngadto sa Hilongos Leyte.

"Gusto unta namong pabalikon diri ang walo nga naluwas kay aron mahinabi namo, pero didto nalang kuno sila kay naa may mga paryente unya duol nalang sila og paulian", asoy ni Maraasin



Si PO3 Ferdinand Manto sa Philippine Coast Guard nga nahinabi usab sa Banat News miingon nga tungod sa paghunos sa hangin ug dagkong mga bawod mugna sa habagat maoy hinungdan nga nalunod ang maong motor bangka.