P2.9M matag barangay kada tuig na — Tomas

Giklaro ni Mayor Tomas Osmeña nga dili lang ang nagsingabot nga Asean Summit nga ipahigayon dinhi sa Sugbo karong bulan sa Disyembre ang hinungdan sa P2.9 milyones nga iyang ihatag ngadto sa 29 ka mga bukirang barangay aron mopahigayon og mga lainlaing kalihukan.

Plano ni Osmeña nga himuon nang permanenti matag tuig ang paghatag niya og tag P100 mil ngadto sa nahisgutang mga barangay aron makapahigayon kini og mga tinuig nga kalihukan.

Apan himuon lang kini sa mayor sa higayon nga magmalampuson ang labing unang pagpahigayon niini og lainlaing kalihukan sa mga bukirang barangay sa Disyembre 11 hangtud sa 14 atol sa Asean Summit.

Ang tuyo ug tumong sa mayor nga masulayan ang abilidad sa mga opisyal sa maong mga barangay nga mopahigayon og lain laing kalihukan nga magsilbing re-union sa tanang molupyo sa barangay.

Kini aron madasig usab ang mga molupyo kaniadto sa maong mga barangay nga mibalhin na og puyo dinhi sa kinapusoran sa siyudad nga mopauli sa ilang dapit aron pagsaksi sa maong kalihukan.

Ang laing tumong niini karong tuiga mao ang pagdasig sa mga molupyo dinhi sa dakbayan nga motungas sa maong mga lugar aron pagsaksi sa lainlaing kalihukan ingon man dili makahigayon paglugsong dinhi sa siyudad ang mga molupyo ning maong lugar aron mominos ang mga tawo dinhi sa dakbayan ug masayon na lang unya ang pagpaangay og higpit nga seguridad sa presidente gikan sa lainlaing kanasuran nga motambong sa maong summit.

Atol sa milabay'ng sesyon sa konseho pormal nang gi-aprobahan ang resolusyon ni ABC President Eugenio Faelnar nga nag-awhag pagpagawas og P2.9 milyones nga pundo alang ning maong kalihukan nga adto kuhaon sa Pagcor funds.