Sugbuak hearing gipangayo dinhi sa Cebu gyud himuon

Giawhag sa mga opisyal sa siyudad sa Sugbo ang kongreso nga paminawon ang yangungo sa mga Sugboanon pinaagi sa pagpahigayon og public hearing dinhi sa Sugbo may labot sa balaodnon nga nagtinguha alang sa pagtukod og dugang tulo ka mga probinsya sa Sugbo.

Si Konsehal Edgardo Labella, tsirman sa committee on laws sa konseho sa siyudad mopasar og resolusyon alang ning maong katuyoan atol sa sesyon niini karong sunod semana.

Nasayran nga duna nay duha ka managlahi nga resolusyon nga giaprobahan ang konseho sa dakbayan nga nagpadayag og pagsuporta sa demanda sa mga Sugbuanon pagpahigayon og public hearing dinhi sa Sugbo may labot sa maong balaodnon.

Nasayran nga atol sa milabay'ng deliberasyon sa House Committee on Local Government nga gidumala ni Kongresista Emilio Macias sa Negros Oriental giaprobahan niini ang tulo ka resolusyon nga nagtinguha pagmugna og dugang tulo ka probinsya dinhi sa Sugbo.

Gihulagway ni Labella si Macias nga nagpabungol-bungol ug wala maminaw sa hangyo sa mga Sugboanon nga dunay konsultasyon nga matigayon dinhi sa Sugbo pagkuha sa sentimento sa mga Sugboanon kabahin sa maong balaodnon.

Tungod niini, nakahukom ang konsehal nga mopasar og resolusyon aron deriktang ipaabot ang iyang hangyo ngadto sa kongreso aron duna gyuy matigayon nga public hearing dinhi sa Sugbo.

Nasukip sa maong resolusyon sa konsehal ang pagdayeg kang Kongresista Antonio Cuenco nga maoy hugot nga misupak sa maong balaodnon atol sa deliberasyon niini sa nahisgutang komitiba ug mi-insister pagpahigayon og public hearing dinhi sa Sugbo.