Korean gipukpok og bato

Usa ka Korean national nga nakainom og ilimnong makahubog nalandig sa pribadong tambalanan human bunali og bato diha sa agtang sa wala pa mailhing tawo kagahapon sa kaadlawon

Kini nahitabo pasado alas 12 sa tungang gabii atbang sa usa ka establisamento diha sa Banilad, ning dakbayan.

Ang biktima giila nga si Kim Yun Woo, 25, ulitawo, tinun-an sa International School sa University of Banilad kasamtangan nagpuyo sa Paseo Saturnino, Maria Luisa Village, Banilad.

Base sa pasiunang imbestigasyon sa Mabolo Police nasayran pinaagi ni SPO1 Elvis Anunciado nga ang biktima gikan nag-inom sa usa ka imnanan diha sa maong lugar.

Matud ni SPO1 Anunciado nga hubog ang biktima ug nangihi daplin sa dalan apan wala makabantay nga adunay nagpaingon nga usa ka wala mailhing tawo nagbitbit og dakong bato sa tuong kamot dayong hapak sa agtang.

Nagtuo si SPO1 Anunciado nga gipareglahan ang biktima sa wala mailhing tawo nga mibunal og bato kaniya.

Daling gidala si Woo sa Perpetual Soccour Hospital samtang ang wala mailhing tawo dali usab nga misibat ug wala na maabti sa miresponding kapolisan sa Mabolo.